Birus eta eraso informatiko asko, telefono mugikorren edo ordenagailu finkoen aurkakoak, esteka baten bidez sartzen dira sistema eragilean. Horren adibide berria da Pegasus, munduko hainbat gobernuk oposizioko kideak eta kazetariak zelatatzeko kontratatu zuten spywarea. Software hori ekoitzi zuen NSO enpresak lotura bat bidaltzen zien biktimei, eta, irekitzen zutenean, Pegasus telefonoan instalatzen zen, sistemako segurtasun-akatsak baliatuta.
Berehalako mezularitza edo posta elektroniko bidez iristen diren iruzur askok antzeko metodoa jarraitzen dute. Horregatik, edozein dela ere susmagarria iruditzen zaigun esteka bat jasotzen badugu, garrantzitsua da esteka segurua dela egiaztatzea ireki aurretik. Lotura segurua den ala ez egiaztatzeko hainbat modu daude. Jarraian, prozesu hori nola egin azaltzen saiatuko gara:
- Esteka aztertu: lotura gaiztoa izan daitekeela susmatuz gero, lehenik eta behin aztertu egin behar da. Webgune batzuek URLak aztertzeko aukera eskaintzen dute, eta estekak malwarerik baduen edo ez edo segurtasun-zerrenda beltzen batean agertzen den jakinarazten dute. Erabilgarrienetako eta errazenetako batzuk pcrisk.com, virustotal.com eta sitecheck.sucuri.net dira.
- Kurtsorea URLaren gainean pasatu: saguaren erakuslea estekaren gainean jartzean, esteka osoa ikus daiteke nabigatzailearen beheko eskuineko izkinan. Horrela, estekak benetan nora eramaten zaituen ikusi ahal izango da, batzuetan esteka horiek laburtuta etor baitaitezke eta ez baitaukate beharrezko informazio guztia.
- Orriaren kodea aztertzea: programazioari eta web kodeari buruzko ezagutza batzuk izanez gero, aukera hau oso erabilgarria da. Horretarako, estekan klik egin ondoren, “Ikuskatu” aukeran sartu behar da. Hori egitean, orri horren kodea duen lauki bat irekiko da. Hortik, webguneko eduki guztia aztertu eta berrikus daiteke, gailuarentzat arriskutsua den ala ez jakiteko.
