Ez gara liburuez arituko: Haur eta Gazte Fikzio Digitala baloratzeko giltzak izenburuko lantegia antolatu du Galtzagorri Elkarteak, Haur eta Gazte Irakurketa Mintegiaren baitan. Lucas Ramada Prieto adituak zuzenduko du tailerra, eta azaroaren 23an egingo da, Donostiako San Telmo Museoan, 09:30etik 13:30era. Izena emateko epea zabalik da; epemuga azaroak 15.
Galtzagorri Elkartearen arabera, “fikzio digitala zer den ikasi nahi baduzu, nola komunikatzen den, nola galdegiten dion hartzaileari edota bitartekari rola nola jokatu dezakezun, zatoz tailerrera. Ramadak azalpen teorikoak eta fikzio digitalak erakutsiko ditu. Fikzio digitalak irakurtzen jakiteko giltzak ezagutu nahi dituzu? Tailerrean haurrei zein gazteei zuzendutako kultur forma berri horiek ulertzeko erremintak emango ditu Ramadak”.
Proposamena askotariko profesionalentzat diseinatu da; tartean, “irakasle, liburuzain, hezitzaile, dinamizatzaile, sortzaile, ikerlari, guraso, irakurle…”. Finean, tailerrean jorratuko den gaian interesa duen orok parte har dezake.
Galtzagorriko Irakurketa Mintegiko kideentzat doan da, Galtzagorriko bazkideentzat 40 euroko prezioa du eta bazkide ez direnentzat 60 eurokoa.
