Bizkaiko 30 euskara teknikari bildu dira gaur goizean Euskararen Etxean egindako jardunaldian, gazteen ikus-entzunezkoen kontsumo-ohituren berri izateko. Datuok Ikusiker Ikus-entzunezkoen Behategiko kide Beatriz Narvaizaren eta Maialen Goirizelaiaren eskutik jaso zituzten.
Izan ere, Ikusiker Ikus-entzunezkoen Behategiak Euskal Autonomi Erkidego eta Nafarroako gazteen ikus-entzunezkoen kontsumoa aztertu du 11 eta 23 urte bitarteko ia 3.000 gaztek osatzen duten panel baten bitartez. Ikerketa proiektua Applika+ programaren parte da, EHUk, EITBk, Tabakalerak eta Kulturaren Euskal Behatokiak sustaturiko programa da eta helburua, besteak beste, gazteen ikus-entzunezkoen kontsumoa, ohiturak eta formatuak zeintzuk diren ezagutzea eta horietan sakontzea da.
Horrekin batera, Azkue Fundazioko zuzendari Iurdana Acasusok fundazioak gazteekin garatutako bi esperientzia garatu ditu, biak ala biak ikus-entzunezko produkzioarekin, esparru digitalarekin eta euskararekin lotuta: Interneten eta Bizkaiko hainbat udalerritan garatzen den Bziber egitasmoa eta Bilboko Udalarekin lankidetzan egiten den Btuber proiektua. Azkue Fundazioaren xedea da euskara esparru digitalean sustatzea, eta bere jardunean arreta berezia jartzen du gazteengan.
Jardunaldia Alkarbiderekin lankidetzan egin da. Alkarbide Bizkaiko Lurralde Historikoko udal eta mankomunitateetako euskara zerbitzuen bilgunea da. Jardunaldian, besteak beste, Barakaldoko, Mungiako, Etxebarriko edo Ortuellako teknikariek parte hartu dute. Guztira, 30 teknikari inguru.
